საქართველოს ჯანდაცვისა და განათლების პრობლემები ადამიანური კაპიტალის განვითარების ჭრილში

ანოტაცია

ადამიანური კაპიტალის ფაქტორი უდიდეს მნიშვნელობას იძენს სოციალურ-ეკონომიკური პროცესების მონიტორინგის, მართვისა და გააქტიურების თვალსაზრისით. ქვეყნის სოციალურ-ეკონომიკური ზრდისა და ეფექტიანი მდგრადი განვითარების მიღწევის დონე, შესაძლებელია, მაჩვენებლების კომპლექსით შეფასდეს, მათ შორის მაღალი დონის სპეციალისტების დაკომპლექტებით მმართველობით ყველა რგოლში და მათი პოტენციალის საუკეთესო გამოყენებით. ადამიანური კაპიტალის ფორმირება-დაგროვება-გამოყენების მწვავედ საჭირო კორპორატიულ სისტემას მხოლოდ ამგვარი მიდგომით მივიღებთ. კვლევის მიზანს წარმოადგენდა საქართველოს ჯანდაცვისა და განათლების ქვესექტორებში ოპერირებადი ადამიანური კაპიტალის განვითარების შესაძლებლობებისა და ხარისხის შეფასება. შემუშავებული საპროგნოზო მოდელის თანახმად, გაკეთდა საჭირო ანალიზი ინვესტიციების ორთავე მიმართულებით - ჯანდაცვისა და ცოდნის კაპიტალების მაგალითზე. გლობალიზების ერაში, კორპორაციების ადამიანური კაპიტალი წარმატების ერთ-ერთი უმთავრესი ფაქტორია. ფაქტია, რომ ქვეყნისა და მისი ეკონომიკური დარგების ინოვაციური განვითარება მეტად ხანგრძლივი პროცესია. ამასთან, ადამიანური კაპიტალის საკვანძო ელემენტებსა და ინოვაციური განვითარების ხერხემალს ჯანდაცვისა და განათლების სექტორები წარმოადგენენ. გამომდინარე, კონკურენტუნარიანი ადამიანური კაპიტალის ჩამოყალიბების პროცესი და შემდგომი განვითარება, როგორც ქვეყნისა და მისი ეკონომიკური ნახტომის განმაპირობებელი ფაქტორის განსაზღვრა, პრიორიტეტს უნდა წარმოადგენდეს, ეკონომიკური ზრდისა და კონკურენტუნარიანობის მაქსიმალურად ეფექტიანი მაჩვენებლების უზრუნველყოფისათვის.