სტომატოლოგიური პაციენტის კმაყოფილების გამოკვლევა საქართველოში

ანოტაცია

მომხმარებელთა კმაყოფილების შესწავლა ზოგადად და განსაკუთრებით სამედიცინო სფეროში, მათ შორის სტომატოლოგიაში, უმნიშვნელოვანესია. აღნიშნული საკითხი აქტუალურია საქართველოში. მართალია, სტომატოლოგიური მომსახურება მოსახლეობის უმრავლესობისთვის დღეისათვის ჩვენს ქვეყანაში სამწუხაროდ  ხელმიუწვდომელია, მაგრამ მიუხედავად ამისა, საინტერესოა ასევე ისიც, ვინც სარგებლობს აღნიშნული მომსახურებით, რამდენად კმაყოფილია მისი შედეგებით.

გამოკითხულთა 71,2% კმაყოფილია მიღებული სტომატოლოგიური მკურნალობის შედეგით, 3,8%-ს ნეიტრალური დამოკიდებულება აქვს,  25,0% კი -უკმაყოფილოა.

გამოკითხულთა 80.1% კმაყოფილია სტომატოლოგისგან მიღებული მომსახურების დონით, 7.4% ნეიტრალური, ხოლო 12.6% - უკმაყოფილო.

კმაყოფილების დონე მნიშვნელოვნად განსხვავდება საქართველოს რეგიონების, ასევე სქესისა და ასაკის მიხედვით.

კვლევის შედეგებით, სტომატოლოგიური მომსახურების კმაყოფილების დონე და მკურნალობის შედეგებით კმაყოფილება მნიშვნელოვნად მაღალია უკმაყოფილებაზე, მაგრამ მიუხედავად ამისა, მაინც დიდია უკმაყოფილება (გამოკითხულთა მეოთხედი ნაწილი გარკვეულწილად ან ძალიან უკმაყოფილოა). აღნიშნული მიუთითებს სტომატოლოგიური მომსახურების ხარისხის არც თუ ისე მაღალ დონეზე და კვალიფიციური კადრების ნაკლებობაზე.

პრობლემატური და დამაფიქრებელია კვლევის შედეგები იმ კუთხითაც, რომ პაციენტთა უმრავლესობა (დაახლოებით 50%) სტომატოლოგს მხოლოდ მაშინ მიმართავს, როდესაც პირის ღრუს რომელიმე დაავადება შეაწუხებს.