პირის ღრუს დაავადებების გავრცელება და მათი მკურნალობის ხელმისაწვდომობა საქართველოში

ანოტაცია

პირის ღრუს დაავადებები თანამედროვე მსოფლიოში ფართოდ გავრცელებული დაავადებებია. აღნიშნული პრობლემა განსაკუთრებით აქტუალურია საქართველოში, სადაც მოსახლეობის 94,2 % რაიმე სახის პირის ღრუს დაავადებითაა დაავადებული. გამოკითხული ქალების 93,7%-ს აღენიშნება პირის ღრუს დაავადების სიმპტომები, ხოლო მამაკაცებში აღნიშნული მაჩვენებელი  95,3 %-ია. 90-95 %-ის ფარგლებში მერყეობს ასევე პირის ღრუს დაავადებების გავრცელების მაჩვენებელი სხვადასხვა ასაკობრივ ჭრილში. რეგიონების მიხედვით კი - 91,2%-დან 95,8%-მდე დიაპაზონში თავსდება. შესაბამისად, მისი მკურნალობისა და პროფილაქტიკის ღონისძიებები მნიშვნელოვანია. თუმცა მოსახლეობის უმრავლესობა (დაავადებულთა 44,9 % ) დაბალი შემოსავლის გამო ვერ ახერხებს სტომატოლოგთან ვიზიტს. ისინი ექიმთან არმისვლის ძირითად მიზეზად ასახელებენ მკურნალობისათვის საჭირო ფულის არქონას. გამოკითხულთა 8,9% მიიჩნევს, რომ სტომატოლოგიური მომსახურება საქართველოში სრულიად ხელმისაწვდომია, 14,4%-ის აზრით, უფრო ხელმისაწვდომია, ვიდრე ხელმიუწვდომელი;  25,7% თვლის, რომ ხელმისაწვდომობის საშუალო დონეა; 34,2% მიიჩნევს, რომ უფრო ხელმიუწვდომელია, ვიდრე ხელმისაწვდომი და 16,8 %-ის აზრით, სრულიად ხელმიუწვდომელია.