მასალების გაგზავნა

ავტორის სახელმძღვანელო

ნაშრომებისადმი წაყენებული მოთხოვნების საფუძველს წარმოადგენს, როგორც საქართველოს, ისე მსოფლიოს წამყვანი სამედიცინო და მენეჯერულ-ეკონომიკური მეცნიერული სკოლების ტრადიციები და რეკომენდაციები, შესაბამის დარგობრივ მეცნიერებათა საერთაშორისო დონეზე აღიარებული წარმატებული გამოცდილება.

ნაშრომი, შესაძლებელია, წარმოდგენილ იყოს ქართულ ენაზე (სრული ინგლისური   თარგმანით) და ინგლისურ   ენაზე   (რომლის  ქართულ აბსტრაქტს, ავტორის სურვილის შემთხვევაში, რედაქცია უზრუნველყოფს), ელექტრონული ვერსიის  სახით, მეცნიერების შესაბამისი დარგის მინიმუმ 5 სარეკომენდაციო რეცენზენტის სიის (საკომუნიკაციო ელ-ფოსტისა და ტელეფონის მინიშნებით) და ანტიპლაგიატის პროგრამაში შემოწმების პასუხთან ერთად. უნივერსიტეტი იტოვებს უფლებას, გადაამოწმოს შემოსული დოკუმენტაცია. ნაშრომი გამოქვეყნდება ინგლისურ ენაზე, ქართულ აბსტრაქტთან ერთად (არსებობის შემთხვევაში).

ნაშრომში დაცული უნდა იყოს შემდეგი თანმიმდევრობა:

ა) ნაშრომის სათაური, ავტორ(ებ)ის გვარი და სახელის ინიციალი, მონაცემები ავტორ(ებ)ზე - ქვეყანა, საფოსტო ინდექსი, სამუშაო ადგილი, ელექტრონული ფოსტა.

ბ) აბსტრაქტი და საკვანძო სიტყვები (არაუმეტეს 300 სიტყვა).

გ) ძირითადი ტექსტი: შესავალი, მასალები და მეთოდები, მიღებული შედეგების განხილვა, დასკვნები, გამოყენებული ლიტერატურა. 

ფოტომასალა (JPG, TIFF ფორმატში - მინიმუმი რეზოლუციით 300 DPI), ცხრილები, სურათები, ნახაზები, გრაფიკები, სქემები და დიაგრამები უნდა იყოს დანომრილი (ტექსტში ასეთი სახის ჩანართის ერთი ერთეულის არსებობის შემთხვევაში, ნუმერაცია არ არის საჭირო), დასათაურებული და აღწერილი, წყაროს მინიშნებით (არსებობის შემთხვევაში).

ფორმულები  უნდა აღინიშნოს Microsoft Equation-ში.

ნაშრომი უნდა შესრულდეს Microsoft Word-ში Sylfaen შრიფტით.

ფურცლის ზომა A4, ველები: ზედა - 2.0 სმ, ქვედა - 2.0 სმ, მარცხენა - 2.0 სმ, მარჯვენა - 2.0 სმ; ინტერვალი -1,15;  სათაური 24 შრიფტით, ავტორების სია - 16, აფილაციები, იმეილი, დოი - 11, ტექსტი - 12, ქვესათაურები/სექციები, მათ შორის აბსტრაქტი და საკვანძო სიტყვები - 14 (Word-ის Heading 1-ით, დანართი 1-ის მიხედვით).

ნაშრომში გამოყენებული ლიტერატურისა და წყაროების მითითებისას, ვსარგებლობთ ამერიკის სამედიცინო ასოციაციის ფორმატი (AMA Sitation Format https://www.pmid2cite.com/ama), რაც, ჩვენი რედაქციით, გულისხმობს წყაროს ციფრულად “კვადრატულ ფჩხილებში” მინიშნების  წესს ამერიკის სამედიცინო ასოციაციის ფორმატის თანმიმდევრობით https://www.scribbr.com/category/ama/: ლიტერატურის სიაში (References), ყოველი წყაროს ნომერთან, ავტორის/ავტორების გვარი და ინიციალები, სათაური, წიგნის/ჟურნალის დასახელება, გამოცემის ადგილი, წელი, წიგნის/ჟურნალის  №, გვერდები, დოი (არსებობის შემთხვევაში); ტექსტში, კვადრატულ ფრჩხილებში, უნდა მიეთითოს ავტორ(ებ)ის შესაბამისი ნომერი, ლიტერატურის სიის შესაბამისად.  მაგალითად: 

1. წიგნის შემთხვევაში - Smith A. The Wealth of Nations. The Glasgow edition. 1976: 456. 
2. სტატიის შემთხვევაში - Walter L, Dumke K, Oliva A, et al. From tobacco to obesity prevention policies: A framework for implementing community-driven policy change. Health Promot Pract. 2018; 19(6): 856–862. doi: 10.1177/1524839918760843.

ნაშრომის მიღება, რეცენზირება და გამოცემა

სამეცნიერო ნაშრომი მიიღება ჟურნალის ვებგვერდზე შექმნილი სარეგისტრაციო ექაუნთის საშუალებით ან ელექტრონულ ფოსტაზე journal@geomedi.edu.ge და ექვემდებარება სავალდებულო რეცენზირებას (peer review). თითოეულ ნაშრომზე, სარედაქციო კოლეგია არჩევს მინიმუმ ორ რეცენზენტს.

გადაწყვეტილება ნაშრომის გამოქვეყნების ან უარის შესახებ, ავტორს ეცნობება ნაშრომის წარდგენიდან 2 კვირის განმავლობაში. ნაშრომის გადასამუშავებლად დაბრუნების შემთხვევაში, სრულყოფილი ვერსიის წარმოსადგენად, ავტორს დამატებით ეძლევა 5 სამუშაო დღე (ექსპერიმენტალური კვლევის გადამუშავების შემთხვევაში - მაქსიმუმ 2 თვე).

ნაშრომის რეცენზირება წარმოებს ორმაგად დაფარული სტილით - არც რეცენზენტებისთვის არის ცნობილი ავტორის ვინაობა და ავტორებისთვისაც უცნობია რეცენზენტების შესახებ.  რეცენზენტები ნაშრომს აფასებენ სამი კრიტერიუმით (იხილეთ დანართი 2):

ა) აქტუალურობა; 

ბ) მეცნიერული ღირებულება და სიახლე; 

გ) შესაბამისი და უახლესი (ბოლო 5 წელი) მეცნიერული წყაროების გამოყენება. 

თითოეულ კრიტერიუმზე განისაზღვრება 10-ქულიანი შეფასება. 

აღმასრულებელი რედაქტორი უზრუნველყოფს რეცენზენტების საშუალო შეფასების დადგენას და, თუ ნაშრომი ფასდება 21-30 ქულით, ის ქვეყნდება (შენიშვნების დასაბუთებული ნებაყოფლობითი გათვალისწინებით). 11-20 ქულის შემთხვევაში - ნაშრომი უბრუნდება ავტორს გადამუშავებისათვის, ხოლო ნაკლები შეფასებისას - ავტორს ეცნობება უარი ნაშრომის გამოქვეყნებაზე.

გამოქვეყნებულ ნაშრომზე ყველა ავტორს გადაეცემა შესაბამისი სერტიფიკატი ელექტრონული ფორმით.

ჟურნალში გამოსაქვეყნებლად წარდგენილ ხელნაწერში, ანტიპლაგიატის სისტემის მიერ, 15%-ზე მეტი მსგავსების გამოვლენისას, ნაშრომი განხილვის გარეშე უბრუნდება ავტორს, გამოქვეყნებაზე უარით. 15%-ზე ნაკლები მსგავსების შემთხვევაში, ნაშრომი ეგზავნება რეცენზენტებს, რომლებიც იღებენ გადაწყვეტილებას, ნაშრომის ჟურნალში კორექტირების გარეშე გამოქვეყნების ან ავტორ(ებ)ისთვის კორექტირების მიზნით დაბრუნების თაობაზე. 

ნაშრომის გამოქვეყნების საფასური, საქართველოს მოქალაქეებისა და საქართველოში რეგისტრირებული ორგანიზაციების წარმომადგენლებისათვის შეადგენს 100 ლარს (უნივერსიტეტ გეომედის აფილირებული აკადემიური პერსონალისათვის გამოქვეყნება უფასოა), საზღვარგარეთ რეგისტრირებული ორგანიზაციების წარმომადგენლებისა და ინდივიდუალური მკვლევარებისათვის - 100 აშშ დოლარის ექვივალენტ ლარს. ქართველი და საზღვარგარეთელი ავტორების ერთობლივი კვლევის შემთხვევაში, განისაზღვრება საქართველოს მოქალაქეებისათვის დაწესებული 100 ლარიანი საფასური. ნაშრომის გამოქვეყნების მსურველმა  საფასური უნდა გადაიხადოს უნივერსიტეტის საბანკო ანგარიშზე, უნაღდო ანგარიშსწორების  გზით, ნაშრომის გამოქვეყნების თაობაზე თანხმობის მიღების შემდეგ. 

ნაშრომის გამოცემასთან დაკავშირებული საკითხები:

ა) ნაშრომის რაოდენობრივი მახასიათებლები სახეების მიხედვით: 

- ორიგინალური კვლევა, რეკომენდირებულია, გამოქვეყნდეს მინიმუმ 1.5 ათასი და მაქსიმუმ 5 ათასი სიტყვის მოცულობით, რაც, რედაქციის გადაწყვეტილებით, განსაკუთრებული მნიშვნელობის შემთხვევებში, მეტი მოცულობითაც შეიძლება დაიშვას. გამოყენებული ლიტერატურის სარეკომენდაციო რაოდენობა 10-70;

- მიმოხილვითი ხასიათის შრომა, ასევე, 1.5-5 ათასი სიტყვის მოცულობით, გამოყენებული ლიტერატურის სარეკომენდაციო რაოდენობა 20-100;

- სამეცნიერო მოხსენება 1-2.5 ათას სიტყვამდე მოცულობით და დასაბუთებული მოსაზრება, სამედიცინო შემთხვევის აღწერა და სხვა - 0.5-1.0 ათას სიტყვამდე მოცულობით.

ბ) რედაქტორებისა და სარედაქციო კოლეგიის წევრების მონაწილეობა სტატიის გამოქვეყნებაში: მთავარ და აღმასრულებელ რედაქტორებს და სარედაქციო კოლეგიის წევრებს არ ეკრძალებათ სტატიების გამოქვეყნება ჟურნალში, გამოქვეყნების საერთო პირობების დაცვის სრული შენარჩუნების მოთხოვნით.

გ)     მიმდინარე ნომერში წარდგენის ჯერადობა: ერთ ნომერში, ავტორმა შეიძლება გამოაქვეყნოს არაუმეტეს ერთი სტატიისა მთავარი ავტორობით. 

დ)  ავტორებთან უკუკავშირის ფორმა: რეცენზირების შედეგები ავტორებს ეგზავნებათ შესაბამისი უკუკავშირის ფორმით (იხილეთ დანართი 3).

ე) თანაავტორების შეთანხმების ფორმა: სტატიის გამოგზავნის წინ და რეცენზირების შემდეგ განსახორციელებელი ცვლილებები, თანაავტორების არსებობის შემთხვევაში, აუცილებელია შეთანხმდეს ყველა თანაავტორთან (იხილეთ დანართი 4).

ვ) საავტორო უფლებები და ლიცენზირების პოლიტიკა: ჟურნალის ავტორებისათვის მოქმედებს საყოველთაო დაშვების ლიცენზია (CC BY https://creativecommons.org/licenses/by/4.0/). ლიცენზია გულისხმობს ნაშრომის თავისუფალი გამოყენების უფლების მინიჭებას და ის საშუალებას აძლევს ნებისმიერ დაინტერესებულ მხარეს, გაავრცელოს ნამუშევარი, თუნდაც კომერციული მიზნებისთვის, იმ პირობით, რომ შრომის ავტორს მოიხსენიებს.

ზ) სტატიების იდენტიფიცირებისა და დაარქივების პოლიტიკა: სამეცნიერო ჟურნალში გამოქვეყნებულ ყოველ სტატიას ენიჭება DOI (ციფრული ობიექტის იდენტიფიკატორი) Crossref-ის მიერ, რაც კვლევის ობიექტებს ინტერნეტში უმაღლესი სანდოობით შენახვადს, ადვილად პოვნადსა და მეტად ციტირებადს ხდის. 

თ) ჟურნალში გამოსაქვეყნებლად ნაშრომის წარმომდგენი ავტორები ვალდებულნი არიან განაცხადონ ფინანსური დამოკიდებულების ან კონფლიქტის არარსებობაზე სპონსორებთან ან სხვა ფიზიკურ ან იურიდიულ პირებთან, რაც კვლევის ჩატარებისა და გამოქვეყნების საკითხებს უკავშირდება, ასევე, რომ წარმოდგენილი ნაშრომი ორიგინალურია და სხვა ჟურნალებში არ არის გამოქვეყნებული ან არ არის წარდგენილი გამოსაქვეყნებლად.

ეთიკისა და დარღვევებზე რეაგირების საკითხები 

ჟურნალის რედაქცია იზიარებს და უერთდება ბუდაპეშტის ღია ხელმისაწვდომობის ინიციატივის (BOAI) სახელმძღვანელო პრინციპებს და პუბლიცისტური ეთიკის კომიტეტის (COPE) პუბლიცისტური ეთიკის პრაქტიკას.

აკადემიური კეთილსინდისიერება მთავარი ღირებულებაა ჟურნალის თითოეული თანამშრომლისათვის.

ჟურნალის აკადემიური არეალის თითოეული მონაწილე ვალდებულია დაიცვას აკადემიური კეთილსინდისიერების პრინციპები, პასუხისმგებლობა, პატივისცემა, ნდობა, სამართლიანობა და ღირსება.

ჟურნალის საქმიანობაში დაუშვებელია აკადემიური თაღლითობა, ტყუილი, პროფესიული გულგრილობა და პლაგიატი (იხილეთ 6.7).

ნაშრომში გამოქვეყნებულ მასალაზე პასუხისმგებელია ავტორი, თანაავტორობის შემთხვევაში - ავტორთა ჯგუფის ხელმძღვანელი (corresponding author).

გამოსაქვეყნებელი ნაშრომის საბოლოო ვერსია თანხმდება ავტორთან ან თანაავტორობის შემთხვევაში - ავტორთა ჯგუფის ხელმძღვანელთან (corresponding author).  

გამოქვეყნებულ ნაშრომში აღმოჩენილი უზუსტობების/ხარვეზების შემთხვევაში, ავტორს  (ან corresponding author) აქვს უფლება, მიმართოს ჟურნალის რედაქციას ელ-ფოსტის მეშვეობით და მოითხოვოს საკითხის შესწავლა და შესაბამისი რეაგირება. 

სარედაქციო კოლეგია ვალდებულია, ყველა ასეთი განაცხადი განიხილოს ორი კვირის ვადაში და დასაბუთებული პასუხი აცნობოს განმცხადებელს. განაცხადის თაობაზე ავტორს (ან corresponding author) ეძლევა შესაძლებლობა საკუთარი განმარტება წარადგინოს. 

უზუსტობის/ხარვეზის დადასტურების შემთხვევაში, სარედაქციო კოლეგია იღებს გადაწყვეტილებას რეაგირების შესახებ. გამოცემის მომდევნო ნომერში უნდა აისახოს შესაბამისი გადაწყვეტილება სათანადო დასაბუთებით.